Më 28 – 29 Maj 2010, EMA në kuadër të projektit “Program praktike në Kuvendin e Shqipërisë”, mbështetur nga National Endowment for Democracy (NED) organizoi një trajnim dy ditor në ambientet e EU Info Center në Tiranë. Qëllimi i këtij trajnimi ishte rritja e njohurive të studentëve dhe ndërgjegjësimi i tyre mbi mënyrën e funksionit të institucioneve qendrore. Njohja me procesin legjislativ, mënyrën e hartimit të projektligjeve dhe marrëdhëniet mids tre pushteteve ishin disa nga temat kryesore për të cilat studentëve iu ofrua informacion ekstra krahas atyre të marrë gjatë studimeve akademike. Ky aktivitet i ofroi mundësinë studentëve për të diskutuar praktikën në një këndvështrim më të gjerë bazuar në eksperiencat personale të akumuluara gjatë periudhës tre mujore në të cilën ato ndoqën veprimtarinë e Komisioneve Parlamentare dhe Seancat Plenare. Në këtë aspekt trajnimi synoi të nxiste të arsyetimin analitik mbështetur në gërshetimin e njohurive teorike dhe praktike njëkohësisht.

Trajnimi startoi me Znj. Baisa Sefa, kërkuese politikash, e cila bëri një prezantim të misionit të EMAs duke u fokusuar në rolin e saj si promovuese e vlerave europiane sidomos tek brezi i ri. Falë mbështetjes së NED, EMA tashmë po krijon një traditë në zbatimin e projekteve që në fokus kanë të rinjtë dhe rritjen e pjesëmarrjes së tyre në jetën publike të vendit. Demokracia nuk mund të konceptohet pa energjinë dhe kontributin e të rinjve të cilën në historinë e tranzicionit shqiptare kanë qënë promotorët kryesorë të progresit. Gjatë prezantimit të saj, Znj. Sefa risolli në vëmendje të gjitha fazat nëpër të cila ka kaluar projekti duke u ndalur në mënyrë të vecantë tek publikimi i “Manualit Informativ të Institucioneve Shqiptare”.
Kjo broshurë ofron një tablo të plotë të  mënyrës së funksionit të shtetit shqiptar, bazuar në ndërveprimin midis pushtetit legjislativ, ekzekutiv dhe gjyqësor. Vëmendje më të madhe në manual i është kushtuar pushtetit legjislativ për shkak të funksionit që ai mbart në një Republikë Parlamentare si Shqipëria. Manuali përmban informacione mbi institucionet e pavarura dhe raportet e tyre me Kuvendin dhe organizatat ndërkombëtare në të cilat Shqipëria aderon. Krahas institucioneve qëndrore, manuali trajton në mënyrë të përgjthshme edhe nocionet bazë të organizimit të qeverisjes vendore, duke qënë në këtë mnëyrë sa më gjithëpërfshirës në informacionet që ai përcjell për lexuesit.

Znj. Erinda Lula, përfaqësuese e EU Info Center, u fokusua në rolin që ka qendra si një dritare drejt Bashkimit Europian dhe mundësive që ai ofron për studentët. Qëllimi i prezantimit të saj nuk ishte vetëm njohja formale me funksionet e EU Info Center në kuadër të ndërgjegjësimit dhe promovimit të vlerave europiane por njohja e qendrës në funksion të shërbimeve dhe lehtësirave që ajo ofron për studentëve. Qendra shërben si një bazë dokumentacioni me informacione të pasura mbi Bashkimin Europian dhe strukturat e tij dhe njëkohësisht si kapilar për përcjelljen e informacionit mbi programet e ndryshme të shkëmbimit në të cilën mund të marrin pjesë të rinjtë shqiptarë. Ajo theksoi se EU Info Center është konceptuar si një mjedis miqësor dhe dashamirës për të rinjtë dhe në funksion të nevojave të tyre, duke shërbyer në këtë mënyrë si enë komunikuese midis BE dhe komunitetit lokal.

Z. Erlir Puto, ekspert ligjor në fushën e së drejtës kushtetuese trajtoi procesin e hartimit të një projektligji dhe marrëdhëniet midis së drejtës kombëtare dhe asaj ndërkombëtare. Iniciativa ligjvënëse dhe fazat nëpër të cilat kalon një projektligj që nga miratimi i tij në parim, nen për nen, e më pas në tërësi ishin disa nga cështjet e lëvruara nga Z. Puto. Gjithashtu gjatë prezantimit të tij nuk munguan edhe aspektet teknike që kishin të bënin me botimin e një ligji në fletoren zyrtare e rrjedhimisht me hyrjen e tij në fuqi. Ai theksoi se në një botë shumëdimensionale raportet midis të drejtës kombëtare dhe asaj ndërkombëtare bëhen komplekse ndaj në të tilla kushte është e rëndësishme përcaktimi i raporteve të epërsisë.

Dita e parë e trajnimit u mbyll me shkëmbimin e eksperiencave që secili prej studentëve po përjeton gjatë tre muajve të praktikës në Kuvendin e Shqipërisë. Njohja me një realitet krejtësisht të ri me të cilin më parë kishin patur kontakte vetëm përmes librave, tashmë ishte reale dhe e prekshme. Disa prej tyre u shprehen se kjo praktikë është një eksperiencë e cila do të lë gjurmë në formimin e tyre profesional. Ndërkohë për të tjerë ajo është një eksperiencë e cila po i ndihmon në qatësimin e ideve për të ardhmen që i pret. Ballafaqimi me konceptet teorike por tashmë të vendosura në një rrafsh praktik i ndihmon studentët në përvetësimin e disa shprehive praktike duke kompensuar në këtë mënyrë boshllëqet e sistemit arsimor. Ata e vlerësojnë këtë eksperiencë dhe shprehen që iniciativa të këtij lloji duhen ndërmarrë herë pas herë e duhen shtrirë edhe në nivel lokal.

Dita e dytë e trajnimit filloi me prazatimin e Z. Blendi Ceka, Profesor në Departamentin e Shkencave Politike, mbi “Sistemin politik në Shqipëri dhe raportet midis pushtetit legjislativ, ekzekutiv dhe gjyqësor”. Z. Ceka përshkroi në mënyrë të detajuar hierarkinë e pushteteve duke u fokusuar në kompetencat e secilit prej tyre si garantues kryesor të demokracisë funksionale. Parimi i “kontrollit dhe balances” ishte një tjetër cështje të cilës ai i kushtoi vëmëndje gjatë prezantimit, kjo për shkak të rëndësisë që ky parim ka në kuadër të demokracisë dhe funksionimit të shtetit ligjor. Z. Ceka nënvizoi se ky parim panvarësisht se dëshmon faktit që pushtetet janë të pavarur nga njëri-tjetri, asnjëri prej tyre nuk është superior mbi të tjerët.

I ftuar në këtë trajnim ishte Z. Momcilo Radulovic, Sekretar i Përgjithshëm i Lëvizjes Europaine në Mal të Zi. Ai theksoi një dimension më specifik të Kuvendit, ndryshe nga dimensioni tradicional që jemi mësuar ta shohim. Gjatë fjalës së tij ai u përqëndrua kryesisht në rolin e Kuvendit në procesin e integrimit europian dhe impetusin që ky institucion i ka dhënë procesit të integrimit në Mal të Zi. Z. Radulovic përmendi se panvarësisht se vende të ndryshme të Ballkanit Perëndimor gjendën në fazë të ndryshme të Integrimit Europian, roli i Kuvendit mbetet në thelb i njëjtë. Ai ëshë institucioni kryesor lider në këtë proces pasi në të përgatitet linja e pergjithshme politike e vendit.
 
Në vazhdim të kësaj temë vjen edhe prezantimi i Z. Gledis Gjipali, Drejtor Ekzekutiv i EMAs. Gjatë fjalës së tij, ai u fokusua në strukturën e Bashkimit Europian dhe nivelin e vendimmarrjes duke i analizuar këto koncepte në funksion të zgjerimit të BE me vendet e Ballkanit Perëndimor. Një vemendje të vecantë Z. Gjipali i kushtoi  rrugëtimit të Shqipërisë drejt Bashkimit Europian dhe prespektivës së saj në këtë drejtim, duke pasqyruar fakte dhe të dhëna reale mbi bazën e të cilave mund të projektohen perceptime reale.

Trajnimi dy ditor përfundoi me seksionin e konkluzioneve ku studentët jo vetëm që diskutuan me lektorët mbi cështjet e trajtuara gjata trajnimit por edhe per perceptimet dhe eksperiencat që ata po përfitojnë nga kjo praktikë.