Më 12 Janar 2009 ka filluar aplikimi i shtetasve shqiptarë për letërnjoftimin elektronik dhe pasaportat biometrike. Sipas Ministrisë së Brendshme, të drejtën për të aplikuar për këto dokumente e kanë të gjithë shtetasit shqiptarë mbi moshën 16 vjeç.

Hapat e aplikimit që duhet të ndjekë një qytetar për t’u pajisur me letërnjoftim elektronik dhe pasaportë biometrike

• Qytetari fillimisht duhet të bëjë pagesën për aplikim pranë zyrës së postës shqiptare. Aty qytetari pajiset me një mandat-arkëtimi të veçantë, që vërteton se ai e ka bërë pagesën për aplikimin për letërnjoftimin elektronik.

• Me të disponuar mandat-arkëtimin nga zyra e postës shqiptare, qytetari mund t’i drejtohet menjëherë zyrave të regjistrimit pranë bashkive, komunave, njësive bashkiake përkatëse.
Kur paraqitet në zyrat e regjistrimit, krahas mandat-arkëtimit, qytetari duhet të ketë me vete edhe një nga dokumentet identifikues aktualë (pasaportë, certifikatë, patentë për drejtim automjeti, fletëhyrje për në institucione, diplomë shkolle, etj).

• Të dhënat personale të qytetarit gjenerohen direkt nga Regjistri Kombëtar i Gjendjes Civile. Më pas operatori i regjistrimit së bashku me qytetarin dhe nëpunësin e gjendjes civile i kontrollojnë këto të dhëna, dhe nëse ato janë të sakta, e printojnë formularin e aplikimit që firmoset nga të tre personat e mësipërm. Në rast se qytetari gjen gabime lidhur me të dhënat e tij personale, atëherë ai i drejtohet gjendjes civile për korrigjimin e tyre.

• Në të njëjtën zyrë qytetarit i merren shenjat e gishtërinjve, i bëhet një fotografi dhe me nënshkrimin elektronik përfundon i gjithë procesi i aplikimit për letërnjoftimin elektronik.

• Pas jo më shumë se dy javësh qytetari shkon për të tërhequr letërnjoftimin elektronik në po të njëjtën zyrë. Tërheqja e letërnjoftimit të ri kërkon që në zyrat e regjistrimit të paraqitet personalisht qytetari që ka bërë aplikimin dhe askush tjetër (psh. ndonjë familjar i tij), pasi letërnjoftimi duhet aktivizuar, dhe për këtë nevojitet përputhshmëria e shenjave të gishtërinjve të qytetarit me ato që përmban karta.